Bo a yega di keda no satisfecho cu cuido medico? Bo a yega di tin un keho, anto bo no sa kico pa haci of nada no ta pasa cu e keho? Bo no ta bo so. Hopi pashent ta sinti mescos. Pero, miles di pashent individual, riba nan mes, no ta mescos cu si tur uni forsa.
Riba 28 di November 2018 a tuma lugar e prome seminario di Fundacion SIKI, titula Derecho di Patient. E Seminario aki a bai hopi hopi bon. E sala tawata basta yen di hende cu a bin participa na e anochi informativo aki y a haña chens pa haci hopi pregunta. De hecho, tawata tin asina hopi pregunta, cu e seminario a ‘loop uit’ cu 45 minuut! Pa Fundacion SIKI esaki ta un exito sigur. 
Loke a resalta den e seminario ta cu e derecho individual di cada pashent no ta mucho conoci, pero ta e base necesario prome cu nos por papia di derechonan colectivo. Hopi pregunta di e participantenan durante e seminario a touch e tema aki. Mas y mas pashent mester siña conoce nan derecho, pero e conclusion ta cu no mucho cos lo pasa pa mehora e calidad di cuido den su totalidad. E sistema no ta traha pa esey. Locual cu si por trece un cambio real y positivo, ta un organisacion cu lo representa e pashentnan na Aruba. Esaki mester ta un organisacion di pashent, pa pashent.
Kiermeen, durante e seminario a bin padilanti e necesidad pa lanta un asociacion di pashent na Aruba. Esaki lo por acumula, vocifera y canalisa e kehonan dilanti di gobierno, AZV y dunadornan di cuido. Asina por cuminsa trece cambionan necesario pa pashentnan na Aruba.
Abo ta kere cu un asociacion di pashent ta necesario? Al fin al cabo, ta nos como pashent mester dicidi.
Bo salud, bo derecho.
Fundacion SIKI
Mehora bo calidad di bida