Por fin bo ta na bo dokter despues di a warda bastante. E tempo di warda na Aruba ta largo. Depende di bo dokter of dunador di cuido, e ta varia entre 3 y 6 luna segun medionan no oficial. Awor tin dos scenario posibel: 1. bo dokter ta dunabo un diagnose of tratamento cu bo ta desea of 2. e no ta dunabo esakinan. E di dos scenario por ta frustrante.
Kico bo por haci? Na prome lugar splica bo preocupacion y puntra dicon e dokter ta pensa asina. Pero awor si toch e dokter no kier cambia su opinion? Esey ta su derecho. Como dokter e ta mara na su asina yama ‘Standard profesional‘. Esaki ta e conocemento medico a base di entre otro literatura y e codigo etico di su profesion. Den otro palabra, e no por haci otro si como profesional e no por para tras di su decision di complace bo y dunabo un otro diagnose of tratamento.
Si ainda bo no ta convenci, bo por pidi bo dokter pa un di dos opinion (un second opinion). Segun e sistema di cuido bo mester pidi bo dokter pa un otro opinion na un otro dokter cu e ta recomenda. Esaki ta haci’e mas facil pa ora cu bo haña un resultado di e di dos dokter y bo mester bin bek na bo dokter tratante, cu e dokter aki ta acepta tambe e testnan, diagnose y tratamento proponi door di un colega cu e ta respeta y confia. Si bo dicidi di bai desconfia/rabia y pio bai riba bo mesun cuenta den exterior y djey bin bek cu diagnose y remedi, esaki no ta bai haci cu bo dokter tambe ta convenci cu asina e ta for di dokternan cu e no conoce.
E relacion entre un dunador di cuido y patient ta uno di confiansa. E confiansa por ta delicado tambe. Ta recomendabel pa cuida e relacion aki mas cu ta posibel, vooral si bo tin un bon dokter y djis tin un diferencia di opinion. No tur ora bo tin e choice di haña un otro dokter mescos of cu e mesun bon relacion cu bo.
Ta bon pa papia habri y vocifera bo preocupacionnan. Si esaki no por cu bo dokter actual, ta recomendabel pa ‘switch’ di dokter. AZV ta permiti dos bes pa aña pa cambia di dokter. Ta posibel tambe pa cambia di specialista una bes e confiansa no tey mas.
Abo tawata sa di e derecho aki?
Bo salud, bo derecho.
Seminario Derecho di Patient, 28 November 2018.