Bo ta comodo pa otro hende haña sa bo condicion medico of cu bo ta bou di cua tratamento? No mester tampoco! Ley ta proteha e privacidad di e pashent. Ningun hende mester sinti cu e mester tin miedo pa bai busca asistencia medico.
Un pashent mester por conta su dokter kico e ta sinti y haña informacion di dokter sin cu ningun hende ta scucha. Pesey e dokter y pashent ta papia tras di porta cera, den un kantoor apart.
Asina mes e realidad por ta hopi diferente. Tin biaha no tin porta. Tin biaha ta un cortina fini ta separa e pashent for di otro hende. Berdad ta cu visualmente ningun hende por wak kico ta pasando cu e pashent y su tratamento, pero otronan por scucha si. Esaki no ta conta?
Sigur cu si! E asina yama privacidad auditivo ta mes importante pa e privacidad di e pashent. Cuido mester garantisa mas cu ta posibel e privacidad completo. Pesey un dokter no mag splica famia kico ta pasando cu e pashent ni duna informacion tocante un operacion riba gang, na unda hopi hende por pasa y tende kico ta wordo bisa.
Lamentablemente Aruba no a ahusta e ley di derechonan di pashent mas manera hulanda a haci. Pesey e ley no ta conta pa tur dunador di cuido, manera botica. Sin menciona nomber, tin botica den cual e pashent mester puntra y haña informacion na un balie cu tur esnan sinta ta warda beurt por scucha exactamente kico e persona a bin busca, cuanto biaha pa dia mester hunta of bebe y otro detayes.
Kico pa haci? Si bo ta sinti esaki no por, entrega un keho. Tur dunador di cuido mester acepta un keho of tin formulario di keho conforme ley di Calidad. Solamente si hende ta haci uzo di su derecho di keha, lo tin cifras y motibo cu por trece cambionan real.
Bo salud, bo derecho!
Mehora bo calidad di bida