Kico ta e 5 pio cosnan cu un pashent por haci? Aki tin un lista di hustamente esey.
Ora cu enfermedad bati na porta di un pashent, e ta busca ayudo. Un kiebra di salud no ta pone cu e lo pensa nada otro cu busca yudansa. Un pashent kier remedi, tratamento of hasta alivio rapido pa dolor. Pero pa motibo di su enfermedad y dolor e por lubida cu e tin cu busca yudansa cerca un otro individuo. E persona aki tambe porta no ta sinti dje bon e dia ey. Mal beis por ta algo real pa pensa riba dje, pasobra bo dokter porta no a drumi bon e anochi prome, of e secretaria no a haci algo cu e mester a haci, of a pasa algo cu su casa of yiu, of cualkier otro circumstancia. Tanto pa pashent como dokter esaki ta hiba na un situacion fastioso den purba yega na bon comunicacion y bon cuido. Tur dos por tin tiki pashenshi na e momento ey y esaki, den boca di pueblo, ta hiba na un posibel ‘mecha cortico’ pa tur dos partido. Ounke e por ta dificil pa evita e actitud di un dokter y tambe enfermedad of condicion di salud, tin algun cos cu mihor un pashent evita haci, sino e por termina ta daña e relacion cu e dunador di cuido di tal forma cu cuido medico ta bira dificil of te hasta imposibel.
Aki ta sigui un lista di e 5 pio cosnan cu un pashent por haci y con pa evita esaki den bida diario.
1 Rabia y no bisa nada
Si un pashent perde su cabes na e momento crucial di cuido esaki por ta comprendibel, pero e ta perde un oportunidad valioso pa vocifera su disgusto ora algo no a bai bon. Un pashent cu dicidi di laga e momento ey bai y keda keto ta acepta e situacion. E dokter, su assistant of cualkier personal a papia fresco? E por pasa, ban ta realistico cu otro. Pero si e pashent no atende cu e comportacion ey, esey kiermeen cu e pashent a acepta. Manera nan ta bisa na Hulandes: ‘Wie zwijgt, stemt toe’. Door di no bisa nada e pashent ta manda un señal cu tur cos ta ok. Awor, tin hende por bisa, pero con mi ta bai bisa algo? E dokter ta bai tratami malo despues! Den un articulo anterior mi a publica con y dicon mester entrega un keho. E pashent cu no haci uzo di su derecho di entrega keho ta dicidi na un manera conciente of inconciente pa haci esey, pero mañan cu pasa algo mas grave y e pashent kier reclama su dokter, e dokter lo bisa e pashent: ‘pero bo no a bisami nada prome tur esaki. Nos a kere tur cos ta ok’. Anto e ora ken su fout esey, di e dokter of di e pashent cu no a bisa nada?
2 asumi
Cuido por ta mes stressful pa e pashent como pa e dokter. E pashent logicamente no ta sinti bon y ta busca ayudo y e dokter ta experiencia un pression pa haci lo corecto. E dokter mester haci su trabow manera un professional y den un tempo limita. Den e situacion aki e pashent por asumi kico e dokter a bisa of loke e no a bisa. Por ehempel, un pashent por haña un verwijsbrief cu e mester entrega ‘dibiaha’ na specialista. Un pashent por asumi cu esaki kiermen cu su caso ta urgente (spoed). Esaki no tur ora ta e caso. Dokternan di cas sa cu tin lista di espera (wachtlijst) di 3, hera 6 luna. Hopi biaha loke e dokter kiermen ta bai awor pa bo no haña un fecha mucho laat. Si un pashent asumi y bai haci ‘escandalo’ den oficina di specialista, esaki no ta yuda e situacion y por torno e confiansa di e specialista den e pashent prome cu ela atende cu n’e. E pashent den e caso aki a label su mes como ‘dificil’, ‘agresivo’ of ‘problematico’ den wowo di e dunador di cuido. Esey no ta un bon manera pa haña e mihor cuido medico posibel. Tambe e pashent por asumi cu e dokter a wak e straño of no ta bisa cierto cos, pero ta sinti cu e dokter ta contra dje. Tur dos forma di asumi ta hiba na expectativa robes, mal comunicacion, rabia inecesario y escalacion.
3 Keha cu tur hende menos e dokter
Un pashent por keda keto si e no ta di acuerdo cu e cuido of trato cu ela ricibi, pero tin pashent ta bai un stap mas leu. Tin pashent ta dicidi di bira passief-aggresief. Na lugar di bisa algo direct na e dokter, e pashent ta bai keha riba social media (por ehempel riba facebook), radio, of cu otro hende, pero no na e dokter mes. Nunca un keho ta wordo entrega. Esaki ta hiba na e illusion cu e pashent a haña oido y solucion berdadero y tambe na un pression riba cuido medico pa ‘haci mihor’ sin cu e dunadornan di cuido ta haña sa precies kico ta bai robes y con nan por mehora. E dunador di cuido por bira sospechoso cu cierto pashentnan ta haci ‘stiekem’ y por bira mas cauteloso y ‘zakelijk’. Na e siguiente bishita e pashent ta ripara un dokter menos habri pa combersa y kizas e pashent no ta haña kico e kier y ta bolbe ventila su disgusto cu otro hende . Asina un circulo vicioso ta wordo crea. Esaki ta hiba na e situacion den cual frustracionnan ta keda acumula den e pashent te cu un dado momento e ta rementa manera un vulkaan: tur hende ta haña ‘un laba y strika’. Esey por splica dicon tin cierto pashent ta bira agresivo ‘diripiente’ of ta agredi un dunador di cuido, cu tur consecuencia di esaki.
4 comportacion baho: Inmoralidad, manipulacion, goroseria
No ta importa con e dunador di cuido a trata e pashent, nunca e pashent mester maha di nivel. Ta comprendibel cu un pashent por sinti frustracion, pero esey no ta hustifica comportacion indecente, inmoral of pio ainda, violento. Un pashent no mester purba corumpi e dunador di cuido door di cumpr’e cu regalo of promesanan sexual. Relacion sexual entre dunador di cuido y pashent ta prohibi pa ley door cu ley ta proteha e pashent. Pesey un pashent no mester bai contrario di e ley y proboca un relacion intimo cu no mag. Un pashent no mester soborna ni menasa su dunador di cuido. Esaki nan ta bai den direccion di comportacionnan castigabel. Tampoco un pashent mester manipula e dokter djis pa haña loke e kier, ‘cueste lo que cueste’. Un pashent mester por papia honesto cu su dokter y confia cu loke e bis’e ta conforme ley, profesionalismo y a lo largo ta bon pa e pashent mes. Na e momento cu un pashent ta sinti cu e no por papia berdad y mester exagera of manipula, esaki ta señal di miedo y desconfiansa. Un ultimo comportacon baho ta goroseria, Si e dokter of un personal a papia na un manera gorosero, mihor e pashent keda riba nivel. E pashent no mester laga e mal comportacion ey causa cu e tambe ta bai actua gorosero bek. Claro cu e pashent mester atende e comportacion dibiaha si, pero un pashent no mester baha su nivel cu palabranan mahos cu no lo yuda su caso y haci mas dificil pa yega na un solucion. Door di keda riba nivel awor ta e dunador di cuido solamente mester pidi despensa y no e pashent tambe. A lo largo e palabra ‘sorry’ ta dificil pa 1 hende bisa, corda 2 hende na otro.
5 keda sin busca su derecho
Por ultimo, tur e cuater prome cosnan por wordo evita si e pashent busca su derecho. E pashent por evita varios malcomprondemento door di djis haci pregunta. Haci pregunta ta e derecho mas fundamental cu un pashent tin. Un pashent por evita tambe hopi problema door di papia cu e dokter y/of entrega un keho oficial. Mas cu claro e pashent no mester comporta su mes na un manera baho, sino adecuadamente. Door di keda comporta nechi e por haci uzo di su derecho di haci pregunta y tambe di entrega un keho. E pashent no mester warda te ora ta laat y asina contribui na e circulo vicioso. E recomendacion ta pa semper haci uzo di e derechonan di pashent.
Si despues di tur esaki ainda no tin solucion, anto mihor e pashent cambia di dokter. AZV ta duna maart/april y September/oktober tur aña pa cambia di dokter y di botica.
Bo salud, bo derecho.
Mehora bo calidad di bida.