Siman pasa Fundacion SIKI a saca un articulo tocante e derecho di pashent versus e derecho di trahador den Hospital, despues di e protesta di trahadornan den Eerste Hulp (SEH) contra agresion fisico y verbal di pashent contra trahador di SEH. Awe ta sigui e derecho riba calidad y seguridad di cuido medico segun e Ley di calidad den cuido. Pashent tin un derecho asina?

CALIDAD

E contesta mas simpel ta: si! Articulo 3 di Ley di calidad den cuido ta duna tur pashent e derecho directo pa haña bon cuido. Esaki ta encera un cuido medico di calidad. Pero kico ta calidad? Esaki no ta defini y no por tampoco. Na ningun pais esaki por wordo defini segun literatura. Pero esey kiermeen cu ningun hende no sa kico ta calidad y pesey e calidad di cuido no ta bon? No, esey no ta corecto. Bon cuido ta significa, entre otro: siguridad y cuido duna na un manera profesional y na tempo. E ley ta duna cierto exigencia minimo. Un di nan ta e organisacion di e cuido.

Organisacion di cuido

Kico ta un bon organisacion di cuido? Articulo 4 di e Ley di calidad den cuido ta encera cu tin suficiente personal cualifica ta traha y cu tin suficiente instrumento medico adecua y un bon reparticion di trabow y responsabilidad entre e profesionalnan.
Loke e ley no ta regla? E construccion. Asina mes, e edificio y tur su facilidadnan, incluyendo Eerste Hulp, ta cai afor di e derecho di bon cuido!

Kico awor?

Esey kiermeen no tin derecho riba esey? Si, pero solamente na un manera indirecto. E Raad van Bestuur (e gerencia) ta keda responsabel na final di cuenta pa e calidad duna. E Raad van Bestuur mester haci tur su esfuerso pa sondea riesgonan pa pashent y haci investigacion na e momento cu esaki presenta pa asina medida por wordo tuma liher.
E desventaha di esaki ta cu pashentnan no tin nada di bisa te ora cu baca hoga. Na e momento ey gerencia mester bati alarma y notifica un calamidad na Inspectie Volksgezondheid Aruba y e pashent por cuminsa un caso, por ehempel pa daño y perhuicio.

E stem di pashent

Dicon mester cambia e situacion aki? Preveni ta mihor cu cura. Ta hopi mas mihor evita daño, cu busca moda di drecha e asunto una bes e tuma lugar.
Pero e ora ta con ta mehora e calidad? Compara cu Hulanda falta varios ley y provision pa duna e pashent su lugar mereci door di fortifica su participacion den e maneho di calidad. Asina na Hulanda pa motibo di e asina yama ‘Wet medezeggenschap cliënten zorginstellingen‘ ta exigi cu gerencia di un hospital mester tene cuenta cu e stem di un conseho di pashent (patiëntenraad). Door cu na Aruba e ley aki no ta existi y tampoco no tin mencion di esaki den e Ley di calidad den cuido, e Raad van bestuur por djis ignora e preocupacionnan di e patiëntenraad sin mester kinipi wowo. E pashent no tin stem cu ta pisa suficiente segun ley.

Futuro

Politica por trece cambio di ley, pero e prome paso ta e pashentnan mes mester tuma. Abo ta satisfecho cu e tiki voz aki? Hopi opinion den e mesun direccion ta hiba na cambio sigur.
Bo salud, bo derecho.
Fundacion SIKI
Mehora bo calidad di bida.