Derecho di keha bo dokter di cas?

Lo bo yega na entrega un keho contra bo dokter di cas? E ta zona drastico y e ta algo cu ningun pashent lo kier experiencia, pero e realidad ta cu e cuido por bai robes. Kico pa haci na un momento asina?
Ban pone bo a haci di bo parti como pashent, pero bo tin duda si bo dokter di cas a actua corecto cu bo of bo no por acepta e manera cu ela tratabo. E prome punto naturalmente ta pa expresa bo disgusto y wak si bo por soluciona esaki cu bo dokter den un combersacion.
Pero ban pone cu abo of bo dokter no kier tira awa den biña pa e relacion di cuido por sigui, kico bo por haci?
Articulo 9 y 11 di e ley di Calidad (AB 2014, no. 74) ta stipula cu bo por entrega un keho na un comision di keho na unda bo dunador di cuido ta afilia. E comision aki lo evalua bo caso y mas pronto cu ta posibel lo determina si bo caso ta funda y si ta asina ki medida bo dokter di cas mester tuma pa remedia e situacion.
E siman aki Aruba por a wak cu e asociacion di dokter di cas, HAVA, a lanta un comision. Nan a logra haci esaki despues di hopi deliberacion pa yega na e punto cu AZV lo financia e infrastructura pa e comision aki. E comision ta consisti di 5 miembro, tur mag di ta dokter di cas menos e presidente. E intencion di articulo 12 ta indica cu e presidente mester ta un persona independiente y no partidista. Normalmente esaki ta un huez, abogado of hurista, pa asina guia e proceso legal y segun principionan di un bon proceso. Asina mester tene cuenta cu e pashent y e dokter di cas mester wordo scucha (“hoor en wederhoor”), pero no ta un obligacion. Den e caso aki a opta pa nombra un fysioterapista como presidente ya cu e no ta traha pa ningun dokter di cas. No ta conoci por cierto, si e reglamento di e comision lo wordo publica conforme art. 9 di e ley di Calidad, ni si e ta accesibel caba na tur dokter di cas. Esaki no a wordo menciona pa parti di AZV y HAVA.

Pero al final, e realidad ta keda cu como pashent bo lo sinti yuda? Na Hulanda e comision di keho aki no a traha, te cu e gobierno Hulandes a kita e comision aki for di ley pa bin cu algo menos burocratico. Awor Aruba kier introduci e sistema aki cu Hulanda a ‘schrap’.

Na Aruba y den Caribe Hulandes nos no tin un cultura di entrega keho. Esaki a resalta caba den e poco casonan di Medisch Tuchtcollege. E motibo? Esaki no ta mucho cla, pero ta parse cu door cu e islanan ta asina chikito cu e miedo pa haña represaya ta grandi y real. Con bo lo keha bo dokter di cas si e no ta habri pa esaki, of pio kier tuma medida contra bo como un ‘mal pashent’?
Falta hopi discusion sano pa mehora e calidad di cuido na Aruba, pa tur pashent awor y den futuro. Abo lo entrega keho? Ban papia pa un mihor calidad di cuido.
Mehora bo calidad di bida.
Fundacion SIKI